Saturday, June 9, 2007

Hoy! Pinoy Ako!



"Ipinagmamalaki ko na ako ay isang Pilipino." Isang pangungusap na paulit ulit nang sinabi ng halos lahat ng Pinoy. Ngunit bakit nga ba mahalaga ang lahing ito para sa isang tunay na Pilipino? Bakit nga ba sa kabila ng lahat, maipagmanalaki pa rin ang lahing ipinaglaban sa kamay ng mga mananakop? Ano nga ba ang meron sa pagiging isang Pilipino? Ikaw, ipinagmamalaki mo ba ang lahi mo? Tara, ibahagi mo!!

"Ano ang ipinagmamalaki mo bilang isang Pilipino?"




Christine Guison:

Nagpapasalamat ako sa Panginoon dahil ginawa niya akong isang Pilipino. Marami akong maipagmamalaki bilang isang Pilipino. Isa na dito ang ating makulay na kasaysayan. Saludo ako kay Dr. Jose Rizal sa talas ng kanyang isipan at kay Andres Bonifacio sa kanyang katapangan. Dahil sa kanilang pagmamahal sa bayan, maipagdiriwang natin ang Araw ng Kalayaan. Maipagmamalaki ko din ang ating mga katangian bilang mga Pilipino tulad ng ating pagmamahal sa ating pamilya, pagiging masiyahin at maka-Diyos. Ang mga katangian na ito ay magpapakilala sa Pilipino sa buong mundo. Tunay na isang karangalan ang maging isang Pilipino kaya naman bilang isang kabataan na naglalayon ng kapayapaan ng bansa, gagawin ko ang lahat ng aking makakaya para sa patuloy na pag-unlad at paginhawa ng Pilipinas at ng buong sambayanan. Mabuhay ang Pilipinas!

Naku, muntik ko ng makalimutan..maipagmamalaki ko ang ating masasarap at natatanging pagkain tulad ng sinigang, adobo, halo-halo at marami pang iba. Yum!



Norman Velasco:


Marami akong maipagmamalaki bilang isang Pilipino, ngunit tunay kong ipinagmamalaki ang isang katangian na masasabi ko na naghihiwalay sa atin sa iba, ang kakayahan natin na buong tapang na humarap sa anumang pagsubok na dumarating sa ating buhay, gaano man ito kahirap. Kitang-kita ang katangiang ito simula pa lamang noong unang panahon nang nilaban ni Lapu-Lapu ang grupo ni Magellan, hanggang sa paglaban ng mga Pilipino upang makamit ang kalayaan laban sa mga Kastila, Amerikano at Hapon at hanggang sa kasalukuyan, ang katangiang ito marahil ang naglagay sa ating mga Pilipino sa tugatog saan man sa mundo, maging OFW, atleta o ordinaryong Pilipino ka man.


Edsel Mendoza:



Ano ba ang maipagmamalaki ko sa aking pagiging Pilipino? Siguro, ang pinakamapagmamalaki ko ay ang katangian natin ng pagpupursigi upang makuha ang kalayaan, o ano man ang ninanais ng mamamayan. Malakas ang drive nating mga pilipino. Kapag mayroon tayong gusto, tiyak na makakamit natin! Natatandaan ko nga ang sinabi ng lola ko noon, Kapag hindi kyang gawin ang isang bagay, "Gumawa ng paraan..." alam kong madyo iba ang dating nito (parang pinapagalitan) pero tama lang din naman. Hindi ba "If at first you dont succeed, dust yourself off and try again..."Yun lang ang kailangan nating gawin at ang ating pagkapilipino ang isa sa mga tumutulong sa atin para makamit ang mga gusto natin, kung para sa sarili man, o para sa mamamayan.

Iwagayway ang bandilang Pilipino! Mabuhay ang Pilipinas!


Christel Espinosa:


Ipinagmamalaki ko ang aking pagiging Pilipino. Tayong mga Pilipino ay naiiba sa mga dayuhan sa ating pagharap sa mga problema. Gaano man kahirap ang ating kinakaharap na suliranin ay buong tapang at lakas-loob natin itong hinaharap. Hindi mo makikita na nahihirapan ang mga Pilipino dahil nakangiti nilang hinaharap ang mga pagsubok. Isa pang ipinagmamalaki ko sa ating lahi ay ang pagmamahal natin sa Diyos, sa pamilya at sa kapwa natin. Kitang-kita sa atin kung gaano kahalaga sa ating buhay ang Panginoon. Siya ang nagiging sentro ng ating buhay. Pangalawa sa Diyos, ang pamilya ang pinakamahalaga sa atin. Hindi natin nakakalimutan bigyan ng halaga ang ating pamilya at kahit anong mangyari ay tayo ay nariyan para sa kanila. Sa pagsapit ng mga suliranin, ang mga Pilipino ay handang tumulong sa kanilang kapwa. Hindi sila nagdadalawang isip na mag-abot ng kanilang tulong. Tulong-tulong ang mga Pilipino sa pag-abot ng kanilang mga minimithi.



Ako ay isang Pilipino. Ipinagmamalaki ko ito.



Reena Collado:

Ano nga ba ang maipagmamalaki ko sa pagiging isang Pilipino? E lahat halos ng mga kakilala ko ay nangangarap na umunlad sa ibang bayan? Sa katunayan, ang dami kong kaibigan na kumukuha ng nursing, mas madami daw kasing pera sa States. Pero bakit ako nandito? Bakit mahalaga pa rin sa akin ang pagiging isang one hundred percent pinoy?

Mahalaga sa akin ang pagiging isang Pilipino sapagkat ipinagmamalaki ko ang kakayahan ng bawat pinoy na mangarap- hindi lamang para sa sarili, kundi para sa bayan. Hindi natin maikakaila na mahabang panahon ang dinanas ng ating mga ninuno sa kamay ng iba't ibang mananakop; ngunit hindi ito naging dahilan upang mawalan sila ng pag-asa. Ang bawa't Pilipino ay tumayo at nanindigan para sa bayan.. Bawa't isa ay nangarap para sa lupang sinilangan. Ipinagamamalaki ko ang bawa't bayaning Pilipino, at ipinagmamalaki ko na ako ay Pilipino. Totoo, marami ang umaalis sa Pilipinas. Ngunit malaki ang aking paniniwala na saan man sa mundo, ang bawa't Pinoy ay may matayog na pangarap para sa kanyang iniwang bayan.. At dala dala niya ang lahing ito- ipinagmamalaki sa buong mundo.

Habang-buhay akong magpapasalamat na kabilang ako sa lahi ng mga taong lumalaban at nangangarap para sa bayan.

Reena Collado, Proud to be Pinay. ;)



Lee Anne Yabut:

MASARAP KAYANG MAGING PINOY!Sa panahon ngayon, naiintindihan ko naman ang mga tao kung sa tingin nila hanggang sa panaginip nalang ang pagunlad ng bansa, ang paglaho ng korupsyon at mga nandadayang opisyal, ang pagwala ng kahirapan. Hindi ako baliw para hindi isipin yan. Madalas napapabuntong hininga nalang ako sa mga balita pero isang araw (Lola Basyang ata ang labas ko nito), umuwi ang nanay ko sa bahay sabay kinuento ang kayang research tungkol sa ekonomiya ng Pilipinas. History kumbaga. Sabi nia: Alam niyo bang pumapangalawa ang Pilipinas sa pinakamayamang bansa sa Asya nung 1972? Pangalawa tayo sa Japan sa yaman, halos industrialized country na nga tayo kung tutuusin. Napaisip ako, kung kaya ng panahon noon na umunlad ng ganun (matapos ang World War 2, matapos ang pananahon ng mga dayuhan), bakit hindi kaya ngayon?

Masarap maging pinoy lalo na kapag nagpapakitanggilas sa isang environment na puro foreigner (at mga english-spokening-in-dollar na mga tao).Masarap maging pinoy lalo na kapag taas noo mong ipagmamalaki na marunong kang magsaing, kapag marunong kang ngumiti kahit gaano kahirap ang buhay, kapag marunong kang kumain ng balot (lalo na kapag nanunuod ka ng Fear Factor sa telebisyon), kapag marunong kang mag-English, mag-Tagalog,mag-Bisaya (may libreng exclusive language ka pa..secret language niyo un!). Masarap maging pinoy dahil sa aking opinyon, ang mga pinoy ang isa sa mga pinakaversatile na tao sa buong mundo. Nakaranas kanang maging mayaman-maunlad. Nakaranas ka narin ng hirap. Kaya ikaw ang may kakayahan para tumayo!Masarap maging pinoy! Kaya pare,ipagmalaki mo!


Lee Anne Yabut, P.I.N.O.Y: Pinaka-Incredible Na Oori-ng-tao,Yeahman!. ;)



Ernest Levanza:

Marami tayong pwedeng ipagmalaki bilang isang mamamayan nang pilipinas. Ang mga manga natin ditto ay tinuturing na pinakamasarap sa buong mundo. Ang ating pambansang kamao na si Manny Pacman ang laging namamayani pagdating sa boxing. Ang mga pamilya dito sa ating bansa ay tinuturing na pinakamatalik sa buong mundo at tayo ren daw ang pinaka hospitable at matulungin na tao. Ito ang mga maliliit na bagay na pwede na nating ipagmalaki.

Ang gusto kong bigyan pansin na bakit natin pwede ipagmalaki ang pagiging pinoy ay dahil sa ating kasaysayan. Noong mga panahon ng mga kastila, pinakita na ng mga pinoy ang ating katapangan at kamahalan sa ating kalayaan. May mga taong naging simbolo nang ating pagkatao at sila rin ang mga dahilan na bakit tayo pwedeng ipagmalaki ang ating mga sarile. Hangang sa kasalukuyan, nakikita natin ang mga minifesto nang ating mga ugali na ipinaglalaban ang mabuti para sa ating minamahal na bayan

Kayo, kabataan! Sagutin ninyo ang tanong na ito: Ano ang ipinagmamalaki mo bilang isang PILIPINO?

Ibahagi ninyo ang sagot ninyo sa amin at sa buong mundo!!